ओलम्पिक खेलकुदमा नेपाली पौडीवाज गुरुङ राष्ट्रिय कीर्तिमान

रियो ओलम्पिक–२०१६ब्राजिलको रियो दि जेनेरियोमा जारी ओलम्पिक खेलकुदमा नेपाली पौडीवाज शिरिष गुरुङले राष्ट्रिय कीर्तिमान राखेका छन् । मंगलबार भएको पुरुष सय मिटर फ्रिस्टाईलमा ५७ दशमलव ७६ सेकेन्डको सयम निकाल्दै शिरिषले ५८ दशमलव २२ सेकेण्डको आफ्नै पुरानो कीर्तिमानमा सुधार गरेका हुन् ।

राष्ट्रिय कीर्तिमानमा सुधार गरे पनि शिरिषले हिट चरण पार गर्न भने सकेनन् । रियो ओलम्पिकमा मंगलबार अन्य दुई नेपाली खेलाडी फुपु ल्हामु खत्री र जिबहादुर मोक्तानले भने बिर्सनलायक प्रदर्शन गरेका छन् । जुडोकी फुपु ल्हामु खत्री पहिलो चरणबाटै बाहिरिएकी छन् । महिला ६३ केजी मुनीको तौल समूहमा फुपु क्यूवाकी खेलाडी मारिसेट इस्पिनोजासँग पराजित भएकी हुन् ।

खेलमा फुपु ११–० को फराकिलो अन्तरले पराजित भए पनि पुरै समय म्याटमा टिकेकी थिईन् । त्यस्तै आर्चरीतर्फ जितबहादुर मोक्तानले पनि दोस्रो चरणको खेलमा ७० मिटर व्यक्तिगत रिकर्भमा भारतका अतनु दासविरुद्ध निराशाजनक प्रदर्शन गर्दै बाहिरिएका छन् । जितबहादुर २९–२६, २९–२४ र ३०–२६ को स्कोरमा पराजित भएका हुन्।

समग्रमा जितबहादुर ६–० ले पराजित हुँदै प्रतियोगिताबाट बाहिरिए । मंगलबारका खेलपछि जारी ओलम्पिकमा नेपालबाट एथ्लेटिक्सका हरिप्रसाद रिमाल र सरस्वती भट्टराई तथा तेक्वान्दोकी निशा रावलको खेल बाँकी रहेको छ । एथ्लेटिक्सतर्फ दुबै खेलाडीले पुरानो राष्ट्रिय कीर्तिमानमा सुधार गर्ने लक्ष्य राखेका छन् भने तेक्वान्दो खेलाडी रावल कम्तिमा एक खेल जित्ने लक्ष्य लिएर रियो पुगेकी छन् ।